រៀនសរសេរកូដធ្វើឱ្យក្មេងមានភាពអំនត់អត់ធ្មត់ក្នុងការធ្វើការងារកសរសេរកូដដើម្បីបង្កើតProject នីមួយៗគឺតែងតែមាន កំហុសខ្លះៗក្នុងការសរសេរលើកដំបូង ប៉ុន្តែក្មេងៗគាត់នឹងព្យាយាមកែកំហុសក្នុងការសរសេរកូដទាំងអស់នោះ ទោះបីជាចំណាយពេលយូរក៏ដោយ នេះគឺដោយសារតែ ពេលដែលកូដពួកគេសរសេរវាដំណើរការមិនត្រឹមត្រូវ ពួកគេនឹងមានការងឿងឆ្ងល់ជាខ្លាំង ហើយជាអំណោយផលពីកំណើតរបស់ក្មេងៗ ពេលដែលពួកគេមានការងឿងឆ្ងល់ពីអ្វីមួយ ក្មេងៗនឺងមិនដើរចេញពីការងារនោះដោយមិនបានចម្លើយនោះទេ ហើយម្យ៉ាងទៀត ក្មេងៗគាត់តែងតែចង់ឃើញលទ្ធផលសម្រេចនៃការសរសេរកូដរបស់ពួកគេ ហេតុផលទាំង ពីរខាងលើនេះធ្វើអោយក្មេងៗខំប្រឹងព្យាយាមកែកំហុសក្នុងការសរសេរកូដរបស់គាត់។

ការស្វែងរកដំណោះស្រាយដោយខ្លួនឯង គឺជាទម្លាប់ល្អមួយទៀតដែលក្មេងៗទទួលយកបានតាមរយៈកម្មវិធីសរសេរកូដ ភាពខុសប្លែកនៃមុខវិជ្ជាសរសេរកូដប្រៀបធៀបទៅនឹងមុខវិជ្ជាដ៏ទៃដូចជាមុខវិជ្ជាគណិតវិទ្យា ឬជីវវិទ្យាគឺនៅត្រង់ថាក្នុងការសរសេរកូដ ក្មេងៗគឺអាចធ្វើតេសកូដរបស់គាត់ដោយខ្លួនឯង ដើម្បីដឹងថាលើកូដនោះមានកំហុសនៅត្រង់ណាខ្លះ។ ហេតុនេះ ក្មេងៗអាចសាកល្បងកែរតម្រូវកូដនោះម្តងហើយម្តងទៀតដោយខ្លួនឯងរហូតដល់ត្រូវ។​ ដូច្នេះ កម្មវិធីសរសេរកូដនេះ គឺបង្រៀនក្មេងឱ្យមានទម្លាប់រកដំណោះស្រាយបញ្ហាដោយខ្លួនឯង។

ជាងនេះទៅទៀត កម្មវិធីសរសេរកូដនេះគឺបង្រៀនក្មេងៗឱ្យមានទម្លាប់ជ្រើសរើសយកវិធីសាស្ត្រ ដ៏ល្អបំផុតក្នុងការដោះស្រាយបញ្ហា។ នេះគឺដោយសារការសរសេរកូដជាទូទៅគឺមានវិធីសាស្ត្រច្រើនយ៉ាង ហើយយើងតែងតែឱ្យកូនសិស្សធ្វើការប្រៀបធៀបវិធីសាស្ត្រនីមួយៗ ថាតើវិធីសាស្ត្រណាដែលចំណាយពេលតិចជាងគេ ហើយបានលទ្ធផលល្អដូចវិធីសាស្ត្រផ្សេងៗដែរ។